Najviši vrh Turske, Ararat, koji se uzdiže na impresivnih 5.137 metara nadmorske visine, osvojen je od članova Sportskog planinarskog kluba „Soko“ sa Cetinja koji su danas uspješno izvršili ovaj veličanstven i težak uspon.
Ovaj poduhvat predstavlja jedan od najvećih uspjeha Kluba u prethodnim godinama, nakon uspješnih uspona na Kilimandžaro, Elbrus i Visoki Atlas.
U ekspediciji, koja je započela 24. avgusta, učestvovali su Jelena Vušurović, Dušan Kaluđerović, Saša Radović i Konstantin Tadoraško. Nakon detaljnih priprema i treninga, tim je krenuo na ovaj ambiciozni uspon. Uslijedili su dani iscrpljujućeg penjanja i prilagođavanja na visinu, nakon čega su svi članovi tima uspješno stigli do vrha 29. avgusta u jutarnjim satima.
“Uspon na Ararat predstavlja veliki uspjeh za Klub i dodatnu motivaciju za buduće izazove. Zahvaljujemo se svima koji su podržali ovu ekspediciju, uključujući sponzore, prijatelje i porodice članova tima, kao i sve one koji su vjerovali u nas. Ovaj uspjeh je rezultat zajedničkog rada i posvećenosti”, poručili su iz Sportskog planinarskog kluba ,,Soko”.
Izvor: Antena M