Prodavci na beranskoj buvljoj pijaci jedva su dočekali početak rada. Saglasni su da je falilo da se radi, da se nešto zaradi, jer je njima to glavni i jedini izvor prihoda. Maske se uglavnom nose, dok distanca nije baš nešto karakteristično za pijacu, pa ni u ovim još uvijek vanrednim okolnostima. Sa pijace navode da je vjerovatno strah kod naroda razlog zašto je dosta manje ljudi na pijaci.
“Ljudi da se plaše, plaše se, a kakva je situacija to svi vidimo. Posla je falilo jer pošto ne primam ni socijalu ni ništa, ovo je jedini izvor prihoda. A i dijete malo kad imate, ne pita ima li, nego trebaš nešto da doneseš, da skućiš, da nešto staviš, a bez posla je to bilo baš teško. Slabo je naroda jutros, još ovo nije to. Očekujemo narednih dana da bude bolje. Koristim zaštitna sredstva, pa sad vidjećemo šta će biti”, kazao je jedan od prodavaca Edvin Isović.
Ima i onih koji kažu da fali više ulaza u pijacu i ljudi sa strane koji će popuniti pazar.
“Nisam radila dva mjeseca i deset dana, bilo je teško, mi od toga živimo, jedva smo čekali da počnemo nismo ni razmišljali o odmaranju, bila sam srećna kad sam čula da počinjemo. Dosta je manje naroda, danas je jedva ko ušao. Samo jedna vratnica je otvorena, ne daju zbog ovih okolnosti da ima više naroda i ulaza. Bilo je mnogo bolje prije, sad nema ni stranaca nego par ovih naših tu što su. Možda će i prodaja krenuti narednih dana, tek smo počeli”, optimistična je jedna od prodavačica.
